Հ Հ Ա Ն. Ռադիոլոգների հետ քննարկվեցին արդիական հարցեր

Հանրապետության առաջատար ռադիոլոգների մասնակցությամբ հրավիրված խորհրդակցության ընթացքում քննարկվեցին ճառագայթային ախտորոշման ոլորտի արդիական խնդիրները:

Մասնագետների` ՀՀ առողջապահության նախարար Արմեն Մուրադյանին ներկայացրած օրակարգային հարցերի թվում էր մասնագիտական միասնական կառույց ունենալու հարցը:

«Մենք կարևորում ենք այս ոլորտում ևս ունենալ մեկ, միաձուլված միասնական դաշտ»,- ընդգծեց Արմեն Մուրադյանը:

Նա հորդորեց քննարկման մասնակիցերին հաջորդ տարվա սկզբին հասարակական գործունեությունը կենտրոնացնել մեկ անկախ մասնագիտական կառույցում, որը կունենա ղեկավար մարմին, ոլորտի զարգացման հստակ տեսլական, կանցկացնի տարեկան ժողովներ և կկարողանա համախմբել հանրապետության ռադիոլոգներին, կառաջնորդվի հաստատված չափորոշիչներով:

Նախարարը մեծապես կարևորեց մասնագիտական միավորումների գործունեությունը, որն առաջին հերթին պետք է միտված լինի ոլորտում առկա խնդիրների վերհանմանը, դրանց լուծման ուղիների մշակմանը:

Արմեն Մուրադյանը խոսեց նաև ՀՀ Ազգային ժողովում առաջին ընթերցմամբ ընդունված «Բնակչության բժշկական օգնության և սպասարկման մասին» Հայաստանի Հանրապետության օրենքում լրացումներ և փոփոխություններ կատարելու մասին ՀՀ օրենքի նախագծին, որի նպատակը առողջապահության համակարգում գործունեություն իրականացնող բուժաշխատողների մասնագիտական որակների և նրանց գիտելիքների բարձրացումն է։

Նախագիծը ենթադրում է շարունակական մասնագիտական զարգացման ապահովում: Բուժաշխատողները յուրաքանչյուր հինգ տարին մեկ պետք է հավաստագրում անցնեն` ըստ այդ տարիների ընթացքում իրականացված մասնագիտական գործունեության, ինչպես նաև ձեռք բերված գիտելիքների և հմտությունների գնահատման հիման վրա:

ՀՀ առողջապահության նախարարի տեղակալ Վահան Պողոսյանի խոսքով` տարիների փորձը վկայում է, որ նախարարության հետ առավել սերտ համագործակցում են այն մասնագիտական միավորումները, ովքեր միասնական են աշխատում:

«Այս կառույցներն աջակից են նախարարության վարած քաղաքականությանը: Մենք սպասելիքներ ունենք մասնագիտական միավորումներից»,- ասաց նախարարի տեղակալը:

Խորհրդակցության ընթացքում մասնագետներն անդրադարձան նաև ոլորտի այլ հարցերի, որոնց թվում էր նաև ճառագայթային ախտորոշման մեթոդով իրականացվող հետազոտությունների իրականացումը, հիվանդի և բուժանձնակազմի անվտանգության ապահովումը:

Հարցեր, պատասխաններ, մեկնաբանություններ